استغفر الله العظيم واتوب اليه

انت ماشي في شارع وحتصادف ناس اشكال والوان طول بالك واتحلى بالصبر يعني حتى المقطع فتح الباب لكن مو باين ايش يعمل هل تلفظ عليك او حركات لا اخلاقية ساعتها تقدر تثبتها وترسلها للمرور وفي النهاية لمحت انه شغل لك الغماز يمكن اعتذار الله اعلم ماتدري يمكمن عنده ظرف طارئ ومستعجل مستشفى او وفاة التمس لأخيك العذر

انا ماعطيته أي اهتمام الشوارع مليانة بشر بعقول حمير وانتم بكرامه لكن جات في بالي ممكن استفيد من التصوير واشتكي عليه

أخي الكريم حسب ماهو موضح بالفيديو ان الشارع واسع وتمر سيارتين بالراحة

المتعارف عليه والنظام ان المسار الأيسر للمسرع سواء كان خدمات او خط رئيسي

يعني كان المفروض اول ماكشح لك وخر عنه يمكن مريض او مجنون او عنده حالة

انت مابعدت مما سبب لك إزعاج هو وكان يمديك تختصرها لكنك اصريت تتناوش معاه عند المطب ولحقته على الخط يااخي خليه يروح وتنفك من شره

سبب المشاكل والمضاربات بالشوارع هو إصرار الطرفين على عدم التنازل

لا إنت الي عطيته درس ولا الي خليته يروح

المرور مايفيدك بهذي الحالات لأن لافيها أخطاء مرورية ولا جنائية

لاتزعل وانا اخوك انت طلبت رأينا ووجب علينا النصيحة والحامي الله سبحانه

الي شفناه بالمقطع انت تكبس له وتلحقه

ياخي افتح الطرق للناس انت بارد وتمشى على مهلك ولا عندك شي 

وفيه ناس عندها ضروف يمكن مريض بيلحق المستشفى او عنده 
موعد تااخر عليه او فيه مصيبه صايره له 

صراحه نوعيتك ترفع الضغط وخر عن الرجال وخله يروح فحاله 

لا وكمان تتعذر بالطريق انه مافي مجال تفتح له الخط 

وبالمقطع واضح فيه اكثر من مسارين ولا جنبك سيارات 

طيب هو هايط عليك وزعلان طيب تروح تهايط عليه ليييه ههههه
المهم اشوف شيء ماهو مستاهل ترفع ضغطك عليه
وغير كذا
المسار اللي بالنص فاضي تروح وترجع مره ثانيه للمسار اليسار ليه
وتمشي وراه عند المطب!!

المهم اللي اشوفه شيء تافه لكن بوقتها بتحصل نفسك منفعل
ومعصب وهو كذا بعد لكن بعد فتره بتحصل انك انت بعد غلطان
انك منفعل على شيء تافهه
ياكثر ماكانت تصير لي بالخط اتهاوش وانفعل
واخرتها اوصل للبيت وانا ندمان قد شعر راسي
اني تهاوشت على موقف مايستاهل وتافه
صح بعض المرات تنفعل وتعصب على بعض الناس
وسواقتهم بس لو تفكر فيها بتحصل نفسك
سبيته سوا سمعك او ماسمعك لكن يبين شكلك
لو انك جالس تسبه حتى هو بيعرف انك سبيته
توصل للبيت ضاربه فيوزاتك بسبب واحد اهبل
اللحين الحمدالله صرت امسك نفسي لو واحد بيلف عطيته مجال
واذا في واحد ماسك السيار يمشي بطيء
اتجاوزه مع اليمين لا انا اشغل عمري بالتكشيح
ولا انا اللي اشغلته اسحب عليه واتجاوزه من اليمين واريح راسي
بدل شغل الورعنه اللحم وراه واخرتها يمسك فرامل بوجهي وبعدها تصير الهوشه

كيف تقول ماعندك مجال ؟ الشارع فاضي ياخويي 
مو وقت زحمه ووقت ذروه الطريق كله ماشفت غيرك انت والسوناتا 
والاكورد البيضاء 
وبعدين صراحة انت غلطان ماشي وراه وعارف انه فيه مطب 
وحتىى لو المقطع فيه صوت كان طلع صوت فرامل يالله مسكت 

شوف انا صار لي موقف امس كنت ماشي بالدايري ١٠٠ بالنص 
وفجاه اشوف مرسيدس جديده ماشاءالله بس مشكلته غلطان 
ماسك مسارين !! قمت شطفته شططفه اليمه خليته يعرف 
ان الله حق ومشيت اخذت مخرج ووقفت عند اشاره 
المهم وقف جمبي وياشر لي انزل القزاز قلي الشي الي سويته 
صح ؟؟ انا كنت مفهي قلت له ايش فيه ؟ عسا خخير؟؟ 
قلي ليش تشطف كذا ! قلتله انت ماسك مسارين ياحبيب !!! 
ولسه زعلان بالنهايه قال امش امش بسس !!! 
رفع ضغطي يعني لو اني ماخاف الله كان شلت الجمبيه 
حقته كلها ويجي نجم بيحط الغلط عليه ماسك مسارين بالداري بعد !! 
بس والله رحمته قلت حرام سيارته جديده وغاليه 
المشكله انه راكب سياره حقت ناس عاقله ناس محترمة 
بس لازم الاشكال ذي تشوفها بالشوارع 
حاول تتحكم بغضبك لانه الغضب مابيوديك غير بداهيه الله يكفينا الشر 

حاول تستمتع بحياتك.. انا ادري انك تقول لو بنفس الوقت سويت كذا وكذا..لكن حاول تنسى الاشياء التافهه هذي..وادري مانزلت الموضوع الا من الزعل اللي فيك..عموما ركز على حياتك واحتياجاتك هي المفروض تاخذ تفكيرك واهتمامك مهو واحد في طريق غلط او واحد مهايط..

معي جينسس شفت العذاب بالشوارع من مساقط وقومات وانا انسان عاقل ومالي ومال اي تهور او سرعه
قررت قبل سنه اشتري تيرسل قديمه
ارتحت نفسيا اقولكم ليش ؟

كل السيارات تخاف مني لو صدمني هوا راح يتندم لان سيارته جديدة وانا سيارتي على قدها
يشوفوني من بعيد يبعدو ويفكوني مشاكلهم ومريح راسي واذا جيت بكشخ بنهايه الاسبوع بالجينسس
والعمل والشغل بالسياره القرمنبع والامور ماشيه

جدي الله يغفر له ويرحمه ويرحم اموات المسلمين

عطاني جملة (( يا ولدي بالشوارع خلك انت الصاحي والباقي مجانين ))

اعط الطريق حقه وانا اخوك والله بتشوف عجايب وهوايل واشتر راحتك وابعد عن الشر وغنيله

ما تدري يمكن رجل معتوه يطلع لك بسلاح ويذبحك على سالفة كبس لي ومطب

وهذا انت تقول مسكر الشباك ومشغل المسجل .. روق يا عم ودع الخلق للخالق

والله يافيه عالم ماتجي الا بنعال على وجهه وانتم بكرامه اكره ماعندي الي يلحم وراي ويشغل اهل اهلي بالتكبيس الله يشغله في نفسه

طيب كبس لك افتح له خط وبالمقطع واضح الخط واسع ويمديك تروح للمسار اليمين عشان يتجاوز
. واذا تبي تشكي عليه وش بقولهم؟ فك الباب مادري وش قال وراح هالاشكال كثيره وربما عنده حاله طارئه عشان كذا مسرع والمسار الأيسر للمسرعين معروف

ي كثر اللي يمسك المسار الأيسر ويمشي على هونه كذا مره تحصل معي والتجاوز من اليمين واموري عل العال الخط فيه الصاحي والمجنون بلاش تلحقه وتكبس له

ماأنصحك تشتكي ممكن تنقلب عليك الاية وتجيب المشاكل لنفسك لأني ماشفت شي غلط انسان يبي يطير خله يروح يمكن الله كاتب يومه .

والله يابن الحلال لو اشتكيته ماراح تستفيد شي لان مافيه اعتداء واضح بالمقطع

عموما خذها قاعده اذا مشيت بالشارع فترى فيهم المريض والعصبي والغبي والمتهور وسيء الخلق وان شاء الله انهم قله
فانت لا تصير واحد منهم وتتهور

بمدينة خميس مشيط قبل 25 سنه تعاندوا اثنين في الطريق ووقفوا بعض
واحد نزل بمشعاب والثاني نزل بليور مفتاح العجل
صاحب مفتاح العجل شاف انه بينجلد لو تشابك مع راعي المشعاب لان مشعابه طويل
قام وسوس له إبليس ورماه بالليور مفتاح العجل واخترق رأس الرجل ومات في لحظتها نسأل الله له الرحمه والمغفره
وصاحب العجل قصوه الله يغفر لهم وكلها بسبب تهور وعصبيه ووسوسة الشيطان

اقول والله انك فاضي

أخوي تبي الصراحة ولا تزعل
أنت تقول الرجال مهايط واللي أشوفه أنا إنك أنت المهايط لأنك لحقت الرجال وتكبس له وبغيت تطوفه من يمين في الثانية 34
وهو تكفى شرك ولا وقف فعليك بالصبر وأنا أخوك واحمد ربك إن ما حصل بينكم شيء وأعتذر منك لو أخطأت عليك

اتفهم التكبيس والتلحيم بالشوارع العامه مثل خريص والدائري الشرقي بس في الحواري والشوارع الي فيها اشارت ليه ؟؟

ببساطه هذولا مرضى نفسيين عندهم عقده لان الناس الطبيعيه ماتسوق ماتسوق مثلهم