أضف سؤال أو موضوع جديد          

سفرتي للكويت والمفاجأة الي سواها الوالد

up 17 down 52
jemmi07 347
قبل 11 شهر و 3 أسبوع



السلام عليكم
الموضوع الاول يتكلم عن رحلتي للكويت بنية اني اشتري سياره وبدت الرحله اولا بالتجهيزات التاليه
١ - رحت و كلمت مديري المباشر أنه يعطيني اجازه خارجيه للكويت وبعد مناجاه وانت منضبط محد يضبط الفصيل غيرك وحنا نحبك وانت منا و فينا وحب خشوم وافق يعطيني اجازه خارجيه
٢ - بدت رحله اقناع اخوي الله يخليه  بأنه يجي معي ووافق اصلا فرح بالخبر وقال لي روح سوي صيانه لسيارته
٣ - بعدها عملية اقناع الوالد الله يحفظه عاد ذي كانت فلم مليئ بالاكاذيب البيضاء والتسليك بانواعه وبعد ما سأل حتى عن الجيران الي بالشقه الي ناخذها قال ( روح وارجع اصلا ابيك ضروري ) ما اعطيت الموضوع اهتمام وسلكت له وقلت له حتى انا عندي لك موضوع ضروري ( تذكروا هذي النقطه )

خرجت وانا مستانس ورحت اخذ سياره اخوي للصيانه ( جمس دينالي ٢٠١٢ ) غيرت له زيت مكينه و قير و بواجي وتنظيف بخاخات وكفرات جديده واليوم الثاني استلمناه

بدأت اسوق من ابها الى الرياض وبعدها تعبت وقلت لاخوي تعال كمل الخط ، وهنا اشتعلت حرب ضروس بيننا على من يستلم عجله القياده وهو يتحجج أنه أكبر مني وانا اتحجج اني تعبان انتهت بأني وقفت السياره وجلست ورا وقلت له يا تكمل يا خليني انام ، طبعا المسكين كمل الى حفر الباطن وبعدها لمنفذ الرقعي وبعدها دخلنا الى دوله الكويت ، ولما وصلت لنفس المدينه سيحااان الله جاني نشاط عجيب واستقبلنا نسيبي الله يجزاك خير رحنا وفطرنا ( تريقنا ) سوا وبعدها خذينا شقه لأننا ما حبينا تثقل عليه

اول يوم ريحنا وثاني يوم قمنا نزور اختي ونسيبي ثالث يوم فرفرنا بالكويت وكذا ومن رابع يوم بدينا ندور على السياره المنشودة وكانت بس فره ناخذ فكره عن الاسعار بس

اليوم الي بعده نويت اشتري سياره من جد و لقيت موتر نظييف لكزس ls2014 نظيفف وسعره لقطه ونويت اشتري لكن جاني اتصال من ابوي ورديت
الوالد : السلام عليكم
انا : وعليكم السلام
الوالد : شوف بدون كلام ابيك تسمعني الآخر ولا تفك فمك ولا تقاطع ولا تقول لا
انا : حاضر ( مع تغير ملامح الوجه و تذكر كل فضيحه عملتها و التفكير في تصريفه تمشي الأمور )
الوالد : شوف يا ولدي انت كبرت وتوظفت ورفعت راسي بين اهلك وجماعتك ، تراني خطبت لك بنية سنعه
انا : وين حقوق الانسان ، وين حقوق الحيوان ، وين حقوقي ، طيب اذا ما ابي تزوجوني غصب يعني هذا الكلام ما ينفع
الوالد : موبكيفك انا بموت ولا شفت عيالك وترا خلاص كلمنا اهلها لا تفشلني وتسود بوجهي
انا : دام الدعوه كذا خلاص انا مالي دخل بأي شي ما غير ادفع المهر والباقي عليك ترا ما عندي فلوس من الحين اعلمك
الوالد : خلاص امري لله انت تعال ويصير خير
انا : بقول متى الشوفه الشرعيه
الوالد : انقطع الخط

كلمت اخوي بالسالفه وقالي دامها كذا لا تأخذ لكزس خذ لك شي وسيع و يكرف ما يقول لا

وبعد مشاورات بيني وبينه وبين نسيبي اخترنا لاند كروزر لكن تجري الرياح بما لا تشتهي السفن

لقينا ذاك الجيب الواقف مثل الأسد ، أنه قاهر الرمال ، أنه ابن الصحراء ، أنه وحش الطرقات ، أنه بطل الدروب باترول

لقيناه بالصدفه فل كامل 320 حصان موديل ٢٠١٣ ممشى قليل راعيه بريطاني مدري فرنسي الزبده اجنبي خواجه وشريناه بسعر ممتاز حول ال١٢٠ الف سعودي

رحنا مع نسيبي عشان ينكتب بأسمه لان اللوح كويتيه ونقلوا ولله الحمد الملكيه ، خرجت من البيت بعدها وخذيت اغراضي انا واخوي ورجعنا وعند المنفذ عيا لاةيخرجني يقول لازم بطاقه سكانيه والاستماره مكتوبه باسم نسيبي وبعدها دقيت عليه وجاء وحركنا من منفذ الرقعي الى حفر الباطن تغذينا وحطيت رجلي ابي اجرب الموتر وما غير ماشي 200 وساهر يصور ولا يوصلني شي ومستانس ومتخيل في الخط أن المدام معي والتخيل اني اتكلم معها هههههههههههه والله جو عالم ضاربين

طبعا وصلت البيت وكلما ابوي على الخطبة واقتنعت اني لازم اتزوج خلاص يكفي عزوبية

وهذي نهايه رحلتي








إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


وش ذا المسلسل ناس فايقه


up 2 down 0
ماجد العتيبي 22 35
قبل 11 شهر و 2 أسبوع



كيف اسعار السيارات في الكويت


up 0 down 1
عبدالله = 2017 -2
قبل 10 شهر و 4 أسبوع