وصول باترول بلاتينيوم 6سلندر لكن السعر

لاتنسون اللايك وترى السعر 234.800 الف ريال

وش رايكم هل يستاهل سعره او لا وعطونا ارآكم ...

لا ما يستاهل للاسف !!! اخذ 6 سلندر و اخلي الجمسات اللي افضل منها بالصرفيه

او لاندكروزر !!
...

غير هذا هو اول ما نزل ما قدرو يلحقون على الطلبات بالذات بالامارات ..

لكن لو تجي في الموديلات الحاليه ..ماهم قادرين يصرفونها !
بسبب العزم الميت.. و صوت المكينه يحسسك راكب اكسنت او مركب مكينه اكسنت !

مرده بينزل ويطيح بس اصبر .. بكرا بتلاقي الاستاندر 6 سلندر على 130 الف والفل 6 سلندر ب 190

لكن اللي اعرفه ان مكاين الباترول بنظام الحقن المباشر لها حد اعلى وحد ادنى بعدد الاحصنه لكنه غير ثابت

مثلا 6 سلندر من 275 الى 290 حصان ومكاين 8 سلندر الصغيرة من 317 الى 340 حصان .. المكينه الكبيره من 400 الى 430 حصان ومكاين النيسمو من 430 الى 460 حصان

ولكن بشكل عام عدد الاحصنه مهم الى حد ما بالسيارات المخصصة للبر لكن الاهم هو التورك او العزم .. مثلا مكينه الكامري 2.5 وتطلع 180 حصان تقريبا بالمقابل مكينه الهايلوكس 2.7 لكنها 155 حصان فقططط ؟ (( مع انها أكبر )) لكن لنفترض انك ركبت مكينه الكامري على الهايلوكس ؟ اوكيه بالخط راح تكون طياره لكن بالبر راح تخيس فيك ولاتقدر تطلع من مكانها .. السبب ان مكينه الهايلوكس الحصانات فيها اقل لكن التورك فيها عالي بعكس مكينه الكامري وباقي مواتر الدفع الامامي

احسه فاشل

مكينة v6 على بودي ثقيل ما ينفع عن نفسي افضل ترجع v8

^^^

للعلم مكينه 6 سلندر هاللي مستحقرها الشعب التورك فيها 420 نيوتن / متر

مع ذلك كنت اتمنى لو كانت توربو زي مكينه الاكسبدشن كان افضل بكثيررر

والله لو هي 12 سلندر سوقها بيكون ميت
من ذا الوكيل التعبان وش الفايده سياره بذا المبلغ
واخرتها فرعين صيانه بالرياض
بدون احتساب الخدمه السريعه ههههههه
البرادو 4 سلندر والفورتشنر4 سلندر اسعارهم غاليه
بدون مواصفات وماليه الشوارع لان ملاكها
عارفين عندهم وكيل وموزعين يوزعون القطع بالبقالات

اتمنى يغيرون الوكيل
ويحطون وكيل مثل العالم والناس
لان والله سيارات نيسان رهيبه
بس وكيلها ظالمها
لو يمسك وكالتها ابو جميل
او الجزيره تبع فورد
ويفكون احتكار القطع كان ترتفع مبيعاتها
وتغطي السوق

يا احبابي 
الكل متفق على ان النيسان لها شعبيه 
ولكن خدمات ما بعد البيع هي الاشكاليه 
الوكيل هو اللي خرب سمعة النيسان 
والله لو يشوفون وكيل حي احسن من هذا 
يصرف البضاعه ويرد لها شعبيتها 

وكيل تعبان ومكينة ضعيفه وسعر عالي

سيكويا /// اكسبيدشن ///لاندكروزر 6 -8 سلندر/// وتاهو/ يوكن/// باترول 2016 8 سلندر/// مليان بالمعارض وسعر اقل

اللي حط السعر غبي واللي راح يشتريه كمخه غباء وكلاء نيسان لاحدود له

مصيرها ترخص ويرهمون عليه مكينة لكزس او كابرس ls1
هههههههههههه

دعابة :))

نازل له ست او ثمان شهور 
ووصل سعر السعودي 210 وفيهومعارض وصل 207 الاف بموقع حراج

معروف العيسى زياده الى 10 الاف عن وارد الخليج اللي بالمعارض
بقية الوكالات الفرق 5 او اقل و تصير عروض بنفس السعر
مهو على المخزن 2014 مثل طريقته اذا توهق