مشكلة القير بعد تغيير الرديتر -تحديث3 حل المشكلة

السيارة التيما 2009 القير اوتو cvt

جرب افحص كمبيوتر اذا لمبة المكينة شغالة .. وشيك عل طرمبة وصفاية البنزين .. ممكن البنزين مايوصل بشكل كااافي 

الرديتر يجي مرتبط مع مبرد القير
فاذا الغشيم راعي الرديترات مايعرف
فالله يخلف عليك

مشكلتك البرمجه والدليل انها ما تقبل بنزين

الحل  افصل البطارية ثم ارجع اشبكها
شغل السياره ولا تدوس بنزين ولا تشغل المكيف لمده 15 دقيقة 
بعدها شغل المكيف وخلها 15 دقيقه
بعدها هذ لفه ع السياره بدون ما تدعس عليها كثير
وبعدها ترجع مثل اول واحسن ان شاء الله 

ممكن نقص زيت الجربكس . لانه الرديتر يمر فيه زيت الجربكس 
في الاسفل للتبريد. و لمن فك الرديتر بيخرج زيت مقدار علبه او اقل او اكثر.
انت شيك زيت الجربكس و زيده اذا ناقص. 

اللي قاله عمر امد هو اقرب للصواب
الرديتر في طابه اسفله يدخل منها زيت القير ليستفيد من تبريد الموية ويطلع للمبرد ثم للقير مره اخى
بعض السيارات مايجي لها مبرد خارجي
بعد فك الرديتر تم تفريغ زيت القير اللي في اسلفه وهو قرابة العلبه ورجع ركبه بدون مايزود
لكن الحل غير زيت القير مع الفلتر وخل الميكانينكي يتأكد من الهوزات راكبه صح بالرديتر والله يستر لايكون حق الرديترا ماركب
الهوز صح والا فيه تهريب طلع عليك زيت القير كله

صحيح كلام الاخوان عندك نقص في زيت الجربوكس زوده وان شاء الله بتروح المشكلة بس احرص علي شراء زيت cvt من قطع الغيار

احتمال الزيت ناقص لانك مادام فكيت الرديتر اكيد راحت الزيوت اللي كانت في المبرد ف عبي زيت في القير

أول شيء افتح عيار زيت القير , إذا لقيت رغوة بيضاء أو ماء , يعني ماء الاديتر خلط مع القير و هنا اقرأ اللي صار معي ,


اللي صار معي :

غيرت الاديتر بواحد من التشليح ,
و بعد يومين صارت الحرارة ترتفع و القير صار فيه طقة قوية من p إلى D و صار القير يعلق على الثالث,

بعد البحث في الورش طلعت المشكلة بالمبرد بالاديتر اللي ركبته , لأن المبرد يمر فيه زيت القير و اختلط ماء الاديتر بزيت القير
بالتالي تضرر الاديتر بنقص الماء و تضرر القير بخلط الماء ,


بالنهاية الحل اللي سويته :

1- رجعت ركبت مبرد الاديتر القديم لأنه سليم , و تسييخ الاديتر , و هنا انهيت مشكلة الحرارة و خلط ماء الاديتر بزيت القير ,

2- القير مريت ورشة و خليته يغير الزيت بزيت رخيص خمس مرات لين تأكدنا إن كل الماء طلع و حطيت زيت رخيص امشي
عليه 1000 أو 2000 كيلو و اروح اغيره ثم 5000 و اغيره هذي احتياطا مني و بعدين ركبت زيت أصلي

بس استمرت مشكلة الطقة و تعليق الثالث و بعد الكشف عند فني قير , غيرت كمبيوتر ( حساسات ) القير قيمته ب 3000

و انحلت المشكلة بشكل جيد , لا زال القير فيه تعليق خفييف بس أفضل من السابق ,

و كل هالخساير اللي تجاوزت 6000 بسبب إني طنشت آخذ اديتر اصلي ب 1800 و اخذت اديتر تشليح ( خساارة )


والله يجعل مشكلتك أبسط بإذن الله

بس هل أنت متعود تغير زيت القير أو لا , لأن هذي مشكلة ثانية ,

ياشباب امس سحبت السيارة للورشة وبعد الكشف حط السيارة
على n طلعت ودعس ماتقبل بنزين يعني المشكلة مو من القير الحمدلله
اليوم الصباح اتصلت عليه وقال مازبطت بالبرمجة
رايكم ايش سبب هالمشكلة وعلاقتها بالحرارة وتغيير الرديتر؟

طلعت المشكلة من الثروتل بدي ( بوابة البنزين) بعد ماضرب الرديتر بخاري الماء انتشر بالكبوت والظاهر جى على الثروتل وخرب الشريحة اللي بداخله جاري البحث عن ثروتل مستعمل دعواتكم

حبيبي الثروتل مايخرب فكة ونظفه واشتر منظف الكترونيات من ساكو يجي بعلبه برتقاليه ونظف حساس الثروتل وحساس القربه وبيضبط ان شاء الله
الثروتل قطعه معدنيه داخلها بوابة تفتح وتغلق بأمر من الحساس اللي راكب عليه هويقرأ البيانات من حساس الدعسه اللي انت تدعس عليها عشان تنطلق ويفتح الثروتل ويقفله سابقاً ماكان فيه هالكلام كانت الدعسات بواير ممتد للثروتل هو اللي يفتح ويسكر البوابة اما الان الدعسات الكترونيه لأغلب السيارات الحديثه زبدة الكلام نظف ثروتلك والحساسات اللي قلت لك عليها بمنظف الكترونيات خاص بإذن الله ترجع وكاله الثروتل نادر خرابه عكس الكربيتر في السيارات القديمه هو كثير الخراب

^
كلام راعي الورشة بيحاول ينظفه بكره  وان شاء الله يضبط
وبنفس الوقت احاول ادور مستعمل بسعر مناسب
مجهز لجميع الاحتمالات لاني متعطل ٣ ايام بدون سيارة

ابشركم انحلت المشكلة وضبطت السيارة
سبب كل هالحوسه اللي صارت طلع من افياش الكمبيوتر
جى عليها بخار الماء وسبب فيها التماس وضبطها راعي الورشة
اشكر جميع من رد على الموضوع وتم توزيع اللايكات مسبقا
يعطيكم العافية

الحمد لله اجت سليمه