شوركم ي الطيبين

وعليكم السلام ورحمة الله وبركاته

اولا .. الله يحفظك سم بالله وصل ركعتين استخر ربك فيها بأنه يسخر لك السيارة الي تكون عون لك لا عليك

ثانيا .. الفرق بين السيارتين : 
--------- الأول : غمارة + حوض مكشوف
--------- الثاني : غمارة + شنطة مغلقة

(( بغض النضر عن المكيف سواء أمامي أو امامي وخلفي ))

بالنسبة لميكانيكية السيارة نفس الشيء .. سرف البنزين نفسه ما يفرق بحسب تجربتي لفتك 2011 بابين مكيف امامي فقط وكان يعيبه انه مكيف واحد يعني الي جالسين ورا ياخذون لهم مهفات يتبردون :)

انت حاجتك للسيارة بعد الشكل العام السابق الي تكلمت فيه وش هي ؟
تبي حوض تحمل فيه وتنقل اغراض وغنم وغيرها  وما عندك اغراض خاصة فيك للرحلات مثلا ... الخ
او تبي مقفص لخصوصياتك مثل عفشك الخاص تبي تحطه بشنطة السيارة وتقفل عليه ويكون معك وين ما تروح ..

هنا انت تقدر تحدد وش تبي صدقني محد يقدر يفيدك عن اغراضك وخصوصياتك وغرضك من السيارة !

اما اذا هي عبارة عن سيارة بس تبيها للبر والطحن والعجن في هالنفود وما يهمك اي شي من الكلام السابق فخذ لك ونيت خفيف وراعي مطامر
اذا انت يهمك الرحلات وأغراضك تغطيها عن الأمطار وتحفظها بشنطة السيارة فخذ لك مقفص 

والله يسهل امرك

بالنسبة للمواصفات اذا بتاخذ فتك ربع اعتقد ما يجي منه مكيفين ولكن تبريده افضل من الفتك الي كان معي اربع ابواب 

بيض الله وجهك يا عزيز انا ابيه استخدام يومي هل ينفع الونيت ولا اخذ ربع احسن

الربع اريح تقدر ترجع المرتبة وتتحكم فيه مو مثل الحوض واي سيارة غمارة مارح تكون ذاك الراحة

الحوض يجي تانكيين والربع لا  الحوض طويل ويتعب شوي بالمواقف  
اما الربع اريح وبالمواقف قصير ومايتعبك بالزحمات  واقوى عزززم لكن اهم شيء تجرب الموترين والله راح تتضح امور 
كثيرة لك وراح تقرر وتأخذ اللي ناسبك واعجبك 

وعليكم السلام
بعطيك معلومه وحطها بين قوسين
انا مستخدم للفتك من موديل 2002 الى يومك واعرف اعطاله ومشاكله مسمار مسمار 
لذا اقولك احرص على القير التماتيك ,اقل صرفيه بنزين واقل اعطال والمكينه مريحه للاخر بسب ان دفرنسات القير العادي تختلف عن التماتيك 

برضو اذا انت راعي بر وطلعات , لا تتنزل عن الدفلوك 

الشباب كفو ووفو بأذن الله
اذا استخدام يومي خذ لك ربع اريح ومثل ما قالو الشباب قير اوتوماتيك 
ليش قير اوتوماتيك ؟
انت في الرياض .. يعني عندك مراجعات ! عندك شغل معين داخل البلد في زحمة الرياض ! عندك مشوار من شرق الرياض لجنوب الرياض ! تبي تروح زيارة صديق او قريب بشمال الرياض وانت بغربها!
القير الأوتوماتيك مريح (( هذا الكلام من ناحية الراحة )) لأن القير العادي مع الزحمة وكثر الوقوف المتكرر بيجيب لك الهم ( ارجولك ويديك تشتغل طول الوقت )) عشق ، ما تعشق ، فرمل ، فك الفرامل ، تعشق الثالث وفجأة وانت في الأول .. اشغلت عمرك في عام 2016

اذا كانت السيارة استخدام بالأسبوع مرتين الى ثلاث داخل البلد .. وتستخدمها بكثرة في البر وتحب الرحلات الجبلية خذ قير عادي 

ومن كلامك استخدام يومي اعتقد افضل لك ( ربع قير اوتوماتيك ) 
ولا يغرك الأوتوماتيك تراه مجنون حتى في البر .. 
( دبل 4H + القير D3 حق تمشيات ودعسات معقولة ) 
( دبل 4H + القير D2 حق دعسات ومطامر بسرعات ما تزيد عن 70 ) 
( دبل 4H + القير D1 تعشيقه وحده ما تفصل بس تأثر على حرارة القير وحرارة المكينة ) 
( دبل 4L + القير D3 تجاكر به في طلوع طويل ) 
( دبل 4L + القير D2 تسحب به لاندكروزر فل كامل وشاص ) ههههههههه هذي لأني ماداني التويوتا خلقه
( دبل 4L + القير D1 تسحب به وايت ناشب في طين ) يستحسن تكون الكفرات حجرية

أتمنى اني قدرت افيد وبالنهاية استنتاجات حسب تجارب سابقة .. ولكل شخص تجاربة ووجهة نضره .. والله أعلم

والله يوفقك ويسهل امرك