استشارة بخصوص ددسن 2016

والله واناواخوك  الددسن ما ينعاف وصبوره.



  بس اذا تقدر تاخد هايلوكس. خذهااا.  

الددسن الموديلات الاخيره الا ما تطلع فيها مشاكل
لو عندي قيمة ددسن جديد اشتريت هايلكس مستعمل 
يتحمل اكثر و اريح و اوسع و منتشر من كل النواحي هو الافضل

الدسن ميزته متعه القيادة والعملانية صدقني مستحيل تلقى الي يكره الددسن الا اذا معه هايلوكس

اصلا المواطن السعودي فيه هرمون اسمه " عشق الددسن" ولا ماكانت عطوها هالاسم لان اسمها من الشركة هو D22

اذا وضعك كذا ماانت من هاالمطفق 
ممتازة الددسن 
بس انتبه تفك الفصلة حقت السرعة وخلها طبيعية 
وسعرها صراحة ممتاز
ومع الخطوط الطويله تبي لها واحد يوسع صدره عليها
متعبه ولها حنه
وباالتوفيق

ماقصرتو وبخصوص الحنه معي كرسيدا يسمعون الحنه من الحي الثاني ههههههه 
وثاني شي مع الوالد ددسن 2002 انشهد انها عز جدا تعجبني إذا سقتها 
وبخصوص اللي يقول اشتر هيلوكس مع إحترامي له ما يعرف مصلحه نفسه 
أولا السعر مبالغ فيه و فيها إلكترونيآت زيادة وهذا شي ما احبه 
وكل الشعب ساحرهم عبد اللطيف جميل عشان يشترون سياراته اللي ما تستاهل 

لو كلامك عن الكامري و الكورولا ممكن في بدائل افضل
لكن الهايلكس يعزك قدام 10 سنوات او اكثر
و لا فيه ذاك التعقيد
و انا مدري عن وضعك بتشتري الددسن جديد ب60 الف
ترا تغيرت جودته عن الموديلات القديمه فيه مشاكل و اسأل راعينه
60 الف تاخذ لك هايلكس دبل او بدون
او فورشنر لو بدون دبل
 موديلات 10،11،12

انا اشتريت ال2013 وقعدت معي سنه ونص وبعتها مافيها الا العافيه
بالنسبة للهايلوكس انا افضلها على الددسن بحاجتين العزم اقوى والوسع بالمرتبه الخلفيه 
اما متعة السواقة الددسن افضل والمكيف والفرامل 

توكل على الله وخذها موتر صبور ويكرف وماتطلب شيء 

والله الددسن بطراانه لكن من ٢٠١٣ والدداسن كلها مشاكل 

انا شريت ددسن2015 قبل 9شهور الى الحين الحمدلله تمام ولا غيرت فيها شئ بس مشكلة الددسن حنة بعد120
المكيف لايعلى علية ممتاز من ناحية الراحة ماهي مريحة الصرفية التانكي اذا عبيت فل يمشيني من450الى503كم 
ما اسرع كثير ومشاويري قليلة العزم تمام السيارة على حسب الاستخدام بعضهم يجلد الموتر ولا يتفقده ويقول السارةالفلانية
خربات ماهي زينة طبعا اغير الزيت على5000الف مع السيفون دآئما 

الددسن ممتاز للبلد وطلعات البر والتحميل ومشاوير الخطوط اللي ماهي طويله يعني 200 كم الى 300 كم ولاهي دايم البنزين ماتصرف الاهم والاميز قطع غيارها رخيصه ماتكلفك مع انها ماتطلب عيبها المرتبه الخلفيه ضيقة بالنسبة للحنه واللي يذكرونها الربع بسبب الكارونه اختلفت في المديلات الجديده عن السابقه الددسن القطري عليه نفس الكارونات الموجوده على مديلات 2002 الى 2004 المعروفه انها ماتحن لانها 8 ريش بس في القومه ضعيفه عكس الدداسن الباقيه قويه في القومه وحنه على 120 واستخر ربك وتوكل اول ماتشتري نزل الوجه 2 سم على شان يتواسى ولايردة الهوى 

دامك مجرب ددسن الوالد فتوكل على الله و15 و16 الظاهر مافيه فرق بينهم الا بالسعر 

مكيف ثلاجه .. 
عزم .. ممتاز جدا .. 
تبي تسوق سواقة اوادم .. والله لو تجلي 20 سنه ماتقول وين الورشه 

تبي مطامر ونفود وتحور عالموتر .. وتشخله ب 2 يبي يطق عليك .. 

قصه بسيطه 

انا قبل سنتين كنت بالحامعه وكنت احطب عليه وابيع مدة ينه تقريبا  . والله ماطلب مني شي يشيل لين يقول بس 

وقبل شهر بديت مراقا خفيف عليه .. يعمي اشخله ب 2 بس ما اريح .. 
طق علي وقام ينقص زيت .. غيرت اكثر من قطعة بالمكينه 

على قولة اخواننا التوانسه .. 

النفس نفسك .. وانت طبيبها 

وش الخمبقة ذي الددسن مافيها الا العافيه شرينا ال13 اللي العالم عيبوا فيها لمدة سنة! وقعدت معنا سنة ونص ماشكينا منها ا شي لا من صرفية ولا من قطع غيار ولا شي موتر ينحط على اليمنى وسعره فيه بس حاول تدور النص فل ام خط تجك ارباقين وفرامل اي بي اسسعرها حدود 55 الف وماتفرق عن الفل الا بالمرايات الكهرب يعني ذي مرايتها عارية

عادية اعتذر عن الخطا

الددسن ممتازة 
بس فيه ناس ياخذون الدداسن ويفحطون ويطعسون ويعدمون ام السيارة ثم يزعلون اذا خربت 
خذ الددسن بس خلك متذكر انها زيها زي اي سيارة يبيلها رعاية وهداوة 
طلعت وحدة قبل 4 شهور عيبها الوحيد الحنة  بعد 120 
المكيف باارد احطه على 1 في الحر السيارة تقلب فريزر 

يا اخوان الددسن تصميم قديم جداً أكل الدهر عليه وشرب ، نفس قاعدة العجلات من عام 86 الشكل الصندوقي والزوايا تسبب 

في ضيق الداخلية وهذا بالتالي لا يصلح لركاب بالغين خصوصاً المرتبة الخلفية وأيضاً لا تنسى مواصفات فقيرة جداً لا ايرباقات

ولا نظام abs وهذا يجعلها لأغراض التحميل أكثر منها استخدام عائلي ، والنوع المتوفر بايربقات نادر جداً ولا يجي إلا 

في الخليجي ، الآن نزل موديل 2016 بجانب النافارا كما هو بدون تغيير ، لكن الجيل الجديد من النافارا لم ينزل وما له 

علم والأرجح والله أعلم بيكون على موديل 2017 وهذا بيجعله طراز الونيت المعتمد للنيسان وبيتوفر منه الغمارة والغمارتين

وإذا ما نزل أتوقع والله أعلم بيكسر الدنيا وبيكون منافس  قوي للهايلوكس نظير المواصفات الي بتنزل معه والشكل العصري 

الذي يتواكب مع التصاميم الجديدة من الانسيابية والأشكال الدائرية للمقصورة وهذا بينعكس على الرحابة والوسع في داخلية 

السيارة . 

بالنسبة لي أنا شريت ونيت ميتسوبيشي موديل 2015 ، داخلية واسعة جداً لا تقل عن وسع داخلية الهايلوكس وغير هذا متماسكة 

وراسية وهذا ما يميزها عن الهايلوكس والددسن ، وسعرها أرخص من الددسن تأخذها بـ 50 ألف جاهزة . 

الموتر يمشي الحال 

كم مروحة فيه
يعني مروحة المكينة ومروحة المكيف الامامية

ودي بددسن ومحتار لأني ابيها للخطوط