رايكم في المكسيما من موديل الـ 2004 الى الـ 2008

استفساراتك تقدر تجاوب عليها بنفسك بدون ما تنزل موضوع
المراتب الخلفية تستفسر هل هي وسيعه
ليش ما تشوفها بنفسك وسيعه او لا المفترض ما تستفسر لانه شيء واضح قدامك
بالنسبة للعزم والسرعه اكيد ما تقارنها بـ4 سلندر مثل ما ذكرت
الديكور تقول له صوت او يطلع لها صوت مع الاستخدام
لو انك بتشتري جديد بتكون مافيها اصوات وبعد فتره ممكن يطلع فيها اصوات يحق لك تستفسر
لكن تسأل عن موديل 2004 يعني لها اكثر من 10 سنوات تكد
تقدر تجربها بنفسك وتشوف فيها اصوات او لا بدون ما تستفسر
قطع الغيار الصناعية عندك استفسر بنفسك
جميع استفساراتك بنظري تقدر تجاوب عليها بنفسك 

ابو عبدالعزيز الرجال جاي منتدى والمنتدى خاص بالاستفسارات وش فيك ع الرجال رديت عليه 10 اسطر وكلها مامنها فايده 
وكل اجوبتك تجاوب عليها بنفسك اجل ليش هالاكلام كله حسيتك جالس تعاتبه
صاحب الموضوع ان شاء الله اهل الخبره يفيدوك 

فيه احد يستفسر عن المساحه الخلفية
ليش ما يفتح باب الماكسيما ويشوف بنفسه ردي ما فيه شيء غلط

هوا سئل الي جربها الي يملكون مكسيما ويبي يعرف اللميزات والسلبيات يمكن ماعمره ركبها او ساقها ويبي يباخذها
والاستفسارات مجانيه وبنفس الوقت استفسارات المنتدى مايمنع

>خلص الكلام 

ي ابو عبد العزيز وش فيك علي ؟؟ 

يا اخي انا اسأل ومابها شيء ، واسألي اللي مجرب السيارة ويعرفها اكثر من غيرها ؟ 

وبعدين لو اقدر اجاوب عليها بنفسي ما نزلت الموضوع ، على العموم شكرا لك :) 

وان شاء الله احصل الاجوبة على الاستفسارات من اللي جربوا السيارة . 

ابو عبد العزيز شاطح هههههههههه  عفون ياصاحب موضوع ماعرف عن ماكسيما الى ان قطعها متوفره بنيسان ومكينتها قويه لكن  خفيفه ماكسيما ماقد استخدمتها وانصحك تاخذ 2008 لن موديله باقي جديد وتبعد عن مستهلك مكروف خذلك شي نظيف وطيب بتوفيق 

ابفيدك عن عزمها القير عادي طياااااره ماشاءالله بديها خفيف و6 سلندر. يسمونها المكسيما اوول التابوت 
وقطع غيارها معروف النيسان متوفر ورخيص اهم شي حافظ عليها وتعيش معاك 

يسمونها بتبوك فراش المـوت

انا ماسقتها بس يمدحوها والقطع متوفرره
 فيها مشاكل بسيطه
سياره اضمن لك تكدها 8 سنوات

هههههههههههههههههههههههههههههههههههههههههههههههههه

ياشباب السياره وسيعه من ورى جاوبو له 

كان معي مكسيما 2007 
من واقع تجربة السيارة انيقة مكينة وجير ماشالله وعزم خرافي عالرغم من انها 3000cc،لكن تشعر انها اقوى من كذا والسبب بوديها خفيف ..ديكوراتها جيدة وكيفها كذلك ..قطع غيارها متوسطة السعر لكنها تدوم وصرفية البنزين عاديم بالنسبة ل 6 سلندر المهم تاخدها شبه نظيفة وماتعرضت لحوادث او تعديلات كهربائية ..اعتقد انها لاتعتبر سياره وسيعه لكنها تادي الغرض اذا مافي عائلة كبيرة… 
بالنسبة للسعر تتراوح بين 16 الى 30 حسب النظافة والموديل والاضافات ..
اتمنى اكون افدتك ياصاحب الموضوع 

بحكم تجربتي السابقه للمكسيما 4 سنوات تقريباً وتوي بايعه .. ابجاوبك على استفساراتك

1- قطع الغيار غالية ولا لا ؟ 

قطع الغيار رخيصه وبعضها سعره متوسط 
لكن حط في بالك ان جودة قطعها عاليه جدا ولا تقارن بالكامري والفورد مثلا ..
مثل الفحمات .. من شريت الموتر ماغيرتها الا مره وحده ب 160 ريال والى مابعت الموتر كان باقي ربع عمر
مشيت عليها تقريباً 60 الف 


2- هل هي مريحة في المطبات والحفر ؟

النقطه هذي ما اقدر اجاوبك عليها لان لها عدة اشياء تحكمها 
مثلا موتري اللي كان معي .. جنط 17 كبير و كفرات ميشلان قاسيه .. وبطن الموتر يحتاج صيانه من جلد وربلات وكراسي مساعدات وغيره 
لذلك مطبها كان قاسي جدا معي وليست مريحه بالحفر


3- وسيعة المراتب الخلفية ؟

انا اشوفها مناسبة جدا 


4- الديكور له صوت ، او تطلع له اصوات بعد فترة معينة من الاستخدام ؟

اذا الديكور ملعوب فيه واكثر من مره تم فكه عشان تركيب مسجل او شاشه .. اكيد راح تسمع صوت خفيف
بالاضافه للدرج اللي بالوسط فوق بالطبلون هذا عيب مصنعي .. دايم ينكسر وتبدا تسمع اصوات 


5- كيف صرفية البنزين ؟

على حسب دعستك 
أحياناً معي اكون راكد ولا يتجاوز rbm 3 وتجلس معي فتره طويله وتكون زي صرفيه 4 سلندر
وأحياناً افجر الموتر ويجلس معي يومين وتكون زي صرفية ال 8 سلندر


6- العزم والسرعة في الخط زين ويطربك ولا مثل سيارات الـ 4 سلندر ؟

العزم والسرعه .. يكفي انه مكسيما 
عادي تروح على مواتر 8 سلندر
كنت امشي على سرعة 200 يومياً للجامعه
رساوتها جباره وعزلها اكثر من ممتاز بشرط انه ماسبق وصار لها حوادث 
تخيل على 200 اروح يمين ويسار لان الطريق زحمه 
وكأني امشي 80 ماشاء الله


7- وتكد معك وتعيش ب النسبة لشخص المحافظ ؟ 

اكيد المحافظ بتعيش معه بدون مشاكل أبداً بس اخرص على النظيف وبترتاح


8- وكم اسعارها من موديل الـ 2004 الى الـ 2008 النظيفه والفل كامل ؟

فل كامل 2004 لؤلؤي نظيف جدا ( بين 20 و 24 )

2008 فل كامل نادر تحصله
 لكن ان لقيت نظيف وممشى تحت 200 فانه تستاهل 28 الى 33 



بالتوفيق ..

جزاكم الله خير على الردود الحلوة ، وبارك الله فيكم ، 




وحصلت مكس الـ 2007 ماشي 250 الف كم ستاندر كم تسوى ؟ 




وش تنصحوني بها اشتريها ولا لا ؟ 

والله ياخوي كانت معايه موتر يبغاله عنايه شديده غير كذا حساسه من ناحية الحراره دورلك اربعة سلندر سواء كامري او سوناتا والنقطة الاهم في الماكسيما مافي احد يصلحها عله والله اللي كانت عندي كل ماوديها ورشة قال ماعرفلها نصيحة اخي ابعد والله ماتسوى 

ستاندر 2007 ممشى 250 

على حسب .. اذا الموتر لونه حلو يعني لؤلؤي او فضي وبديه وكاله ومايحتاج صيانه 

وتماتيك .. بين 23 الى 26

أول شيء لازم تكون حاب السيارة. وهاويها 

السيارة لازم تاخذ نظيف مررة

وماجاه صدمات والكهرب شد بلد ، لأن كهربتها حساسه شوي اذا جاه تعديل

الحرارة ممتازه بشرط الاهتمام بدورة التبريد خصوصا انها مستعمله السيارة

المكينة صاروخ ارض جو

والله ودى اشترى مكسيما 2004 بسعر رخيص وتجلس معى أطول فترة ممكنة