مشورتكم يا اهل السفاري والباترول

وهني اللي من الطلعه شبع = وراح للمقناص مع قرم العيال
فوق جيب اخر موديلات الربع = فيه خفت دم وفيه خفت ظلال
خطه بجنبه تقل ممخش سبع = ولا توقيع الوليد بن طلال
لا تمقلته تقل غارب ضبع = وان نطحته تقل برق في خيال
تقل بالهويات يقبع به قبع = شوت الدعيع يوم المنديال
يسبع الطلعات بعيونه سبع = لا عطاه اثنين سواقه خيال
هو نعده نادر وغيره تبع = طير شرق جاذبه من راس عال
للمواتر ينتله يطق صبع = ما يرده لا جبال ولا رمال
طابعين العز في خشمه طبع = قوم فوجي لعنبوا هاك الخوال
قيمته بالكاش سبعين وسبع = الف بالدرهم ولا بالريال
يجبع المايع لياوصله جبع = الصلابة بمركبه ماهي خمال
ميزته اخذ من الفز طبع = نمرٍ مرنقط ويلحق له غزال
سايقه ما حط على راسه قبع = ولا رمى طاقيته هي والعقال
ولا مطالعهم بعكاش وضبع = ولا طلعوا نقبين ولا راحوا شمال
بالعلا يشون من رمي الصبع = اربع مطنخ زحازيحٍ رجال
ضابطين الشاي من مي النبع = مع مهاديف الذهب حدب الدلال
ها قولوا رايكم يا هالربع = اسمعو بالله ابسألكم سؤال
هو بأحسن جيب من جيب الربع = جربوا والتجربه خير ومثال

اخوي السفاري هي الباترول !!

يمكن قصدك فتك ولا بطل الدروب ؟؟

وعليكم السلام ..... من ناحية القوه والعزم كلها نفس بعض لكن السفاري يتميز بخاصية الدفلوك وهذه أهم ميزه مهمه بالقوه والفائده

وتجي بعدها الأمور الثانويه مثل فتحة السقف والتخشيبه وأنوار الزنون وغيرها من مواصفات الفل ... وبالتوفيق

كلها باترول والسفاري فئة اقل من السوبر سفاري ... يمكن تقصد اللاند والسفاري

ياللي تبا موتر للبعد ساحوته....عليك باللي يقد الحزم نيساني

بترول عزمه وقوه فيه مثبوته...بترول قول وفعل فناني

ماينقل الهم ركابه بسفروته....يوصل بعيد الديار ان كان عجلاني

يقضي دهر راعيه ماكشف كبوته...من جودته ماحصل بالزيت نقصاني

ولياضرب له نفودآ وسطها هوته...يطلع على الطعس ماعشق له الثاني

ينزل ويطاع بروس طعوس مصلوته...يشلع كثيب النفود تقول بركاني

يسبح على الرمل كنه في البر حوته...يعوم عوم السمك بشعاب مرجاني

وليا مشى في جلاد يعجبك صوته...تسمع وحيف الهواء باطراف الاركاني

اشريه واغليه عندي مثل ياقوته...التقنيه متقنه والصنع ياباني

يستاهل المدح سفاري على النوته...ماهو خساره نغني فيه الالحاني

اخير عندي من المنفوخ تايوته...كثر الدعايه لها من غير برهاني

الفكس والجكس والكزس وساكوته...مالي بها كلهاالقاصي مع الداني

تصنيع تجميع دون اتقان مفلوته...ماريدهالو عطوني فكس مجاني

بالخط مااذمها ماهي بمشموته...واما صحاري تعود في خبر كاني

سواقها مايقرب نفد ساموته...والانفود الرفيعه شرق نجراني

للشاعر((المطيري))

قصدك الفتك و ال GL. ??
كل وحده احلى من الثانيه .. الفتك في مميزات كثر.من ضمنها الدفلوك
الGL مافي او في ع انواع محدده
الفتك مكينه 4800 طبلونه 220 مكينه4.8 لتر 24 بلف
الGL مكينه تقريبا 4500 والله اعلم و طبلونه 200 12 بلف
الفتك ثلاجتين
الGL الظاهر ثلاجه وحده و في فئات بدون ثلاجه

الفتك عزمه اقوى
الفتك يجيك قير عادي و قير تيبترونيك
الGL يجيك جيو عادي و اتوقع في مثل الفتك تيبترونيك

الفتك جنط كروم 16 و الجديد 17
ال GL يججيك جنط سلق او جنط حديد عريض
اذا ميزانيتك طيبه .. حط عينك ع الفتك بدون تردد
و استخير ربك بكل شي
 ابوي الله يحفظه عنده واحد GL 2009 وحبيت اعلمك عن بعض المواصفات
اللي اعرفها

تحياتي

طبعا مكينة ال 4500 توقف إنتاجها وصارت بس فتك ال 4800 بفئاته الثلاث ربع شاص صالون  

ان ركبت جيوب نيسان ماعاد ترتاح لسياره

مشكورين بس انا اتكلم عن موديل 92 الى97

مافيه فرق واجد بينهن بس الفل يجي دفلك ولون الرفارف نفس الون البدي وجناح 

gl ممتاز بس بدون دفلك

من ناحية العزم ممتاز واتحداك تعلق بطعس وماتطلع من حالك عجيب الباترول تحسه يشيل نفسسه ويرتفع فوق

واذا دقيت ريوص يهبط تحت , العجيب اذا مشيت فيه ميه واربعين تحس انه يعوم ويتمايل مجنووووووون .

قطعه متوفره ورخيصه واتحدى اللي يقول غير كذا وفيه اكثر من شركه تبيع قطع غياره

خذ لك بخاخ اصرف لك