بعد غسيل السلندر وتغير البلف للسيارة رائحة حرق تظهر

اخوي اتوقع الراس ضررب لن كانت عندي زي مشكلتك حتى وانت ماشي تشم ريحه زي ريحة الحرق 

حتى لو تدسس تشم الريحه 

انت وديها عند مكنيكي يفحصها للك يمكن تطلع حاجه خفيفه 

يارجال قول غيرها تكفى معقول ان الراس راح بعد الغسيل يارب سترك

والله ابرهيم صدقت اي راس واي خرابيط الظاهر انو شئ بسيط احمد الله يهداك ترا ماتعرف السكوت افضل ولا فتوى الراس حق المكينه سليم انتى عندك المكينه بكاملها سليمه ياخي شد حيلك وفكها الصباح وطل بالمكينه وشوف ريحه الحريق من وين يمكن سلك من اسلاك السياره قريب من المكينه وقاعد يذوب ويطلع ريحه انا قلت ممكن يعني مو اكيد والله يسهل عليك تراها سهله ولا تخوف بس شيك

لا عاديه يوم وتروح

اخوي ممكن بالصدفه لصق كيس بشمكان السياره وقامت تطلع ريحه حرق مع عمي فورد كل شوي يلزق فيه كيس ولما توقف جنب السياره تشم ريحتها تحسبها تحترق والكيس اذا لزق بالشكمان مايروح ابدا يحترق لين يصير زي القار ... ومايروح

وش نوع الموية الى غيرتها وحطيتها بالرديتر ؟؟؟؟؟؟؟

كثير من الناس يحط موية خضرا !!!!...... وهى فى الاساس موية تنظيف بس حنا شعب ملعوب علينا على قولتهم وماشين بالبركة....!!!! تستخدم فى تنظيف الرديتر يعنى تصبها وتمشي عليها يوم او يومين وتفرغها وتصب مكانها مويه حمرا او زرقاء هذي هى المويه الحقيقيه للرديتر وعلبه تكفى والباقي تكمله بمويه بطاريه او مويه مقطرة ............ والله يسهل امرك .......... :)

ممكن لصقت حاجة في السيارة وغالبا كيس ! , واتوقع شي بسيط كم يوم ويروح بحكم ان البلف جديد !

والله انت ياخوي غلطان فيه احد يغسل السلندر والموتر جديد 2009 

انا مابي اخوفك واتكلم فالافضل تروح تفحصها عند محل فحص ممتاز وهو بيعلمك

بالتوفيق

يالغالي راس المكينه لو حصل له حاجه لا قدر الله 

الحراره بتنقز كل فتره لان عندي سياره قبل فتره راح راسها قسم يا طفشت كل 10 دقايق ترتفع الحراره 

أنا صارت معي و قالوا الراس 

فحصت السياره طلع حساس الحراره بس 

فالأفضل تفحص السياره و تشوف وش فيها 

ادفع 350 ريال فحص كامل و تاكد بنفسك أفضل 

الله يجزاكم خير طمنتوني ماقصرتوا لااعرف كيف اشكركم ولكن تقبلو 1+ للكل بارك الله فيكم

انا قبل فتره وظبت سيارتي. وخرطت السلندر. 

وبعد الخرط. غسلوه. بمويه. وركبت المكينه. 

وطلع ريحه. حريق استمرت. معي حدود عشره ايام. 

وراحت. الريحه تطلع. اكثر شي. اذا مشيت مسافه. 

ورجعت وطفيت السياره. تشم. ريحه حريقه.  مثل البلاستيك 

اذا احترق. 

سئلت الورشه. قالي عشان. التوظيب والبساتم. جديد. 

وعشان. السلندر. غسلناه. وتطلع الريحه فتره وتروح. 


الخلاصه من الموضوع.  ان حتى السلندر اذا تغسل. بمويه 

يطلع له. ريحه مثل الحريقه  فتره وتروح. الريحه  

هذا اذا ماعندك. شي. ماسك في الشكمان كيس. او لزق. 

انت شف تحت السياره. وشف. حول القزوز. فيه شي يلحق 

الاقزوز. مثل سلك او كيس. لانه مع الحراره. يحترق ويطلع له 

ريحه. 

اذا مافيه شي. كله فتره. وتروح ان شاء الله. 

لو المشكله. براس المكينه.  الحراره. بترتفع على طول. تحصلها 

فوق النص. دايم. 

لاكن الراس سليم بئذن الله.  مافيه الا العافيه.  ان شاء الله